Que é isto?

Saurobuks é un proxecto editorial que comezou a súa andaina alá polo final do 2014 coa edición dun doble libro de poemas e colaxes Lúa Plenur. O que nun principio fora unha brincadeira para pórlle un logo a un artefacto, e que quedara máis xeitoso, converteuse a posteriori na posibilidade de facer máis cousiñas e decidimos entón constituírnos como asociación cultural atopando así a maneira de organizarnos e seguir editando o material propio e de afíns, procurando aunar esforzos para proxectar unhas voces nada comúns, acadando ese impulso de algo pequeniño, nas marxes que non quere, senón ao contrario, seguir canons ou bós costumes. Procuramos saírnos da grea maior e doutras greas menores que seguen o bo camiño, a boa senda… nós preferimos ir por desvíos máis retortos; buscamos revalorizar o pequeno, o local, o singular, o marxinal -si, sen complexos!

Porque nos gustan os libros en papel naceu Saurobuks, e xa publicamos o fotolibro Instalacións e outras deformidades pseudoartísticas no territorio rurbano e recentemente Confesiones de un majara cuerdo. Facemos pequenas tiradas de camisolas en serigrafía feita a man para nenas e adultas que mostramos no apartado de artesanías Saurocrafts. Temos en mente editar música ou ruído que aloxaremos no Saurorekors e quizais tamén tentaremos lanzar algúns artefactos artísticos no Sauroarts.

Saurobuks é un proxecto autoxestionado, non temos ánimo de lucro e polo de agora as cousas vanse sufragando basicamente co retorno das vendas das nosas edicións ou doutros proxectos. Podes axudarnos coa difusión, enviarnos propostas ou suxestións, estamos abertxs a túa colaboración, escríbenos a bronto@saurobuks.com e cóntanos!